Мектебімізде 31- қаңтарда “Оқуға құштар мектеп” жобасы аясында қазақтың көрнекті ақыны Қадыр Мырзалиевтің шығармашылығына арналған әдеби-сазды кеш өтті. Кеш барысында ақынның өлеңдері оқылып, оның шығармашылығы жан-жақты талқыланды.

Іс-шараның алғашқы бөлімінде мектеп кітапханашысы Г. Урунбасарова ақынның өмірі мен шығармашылығына тоқталып, оның кітаптарын таныстырды. Сонымен қатар, экраннан Қадыр Мырзалиевтің өзі оқыған өлеңдері көрсетіліп, көрермендерге ерекше әсер сыйлады. Оқушылар Қадыр Мырзалиевтің туған жер, ана тілі, халықтың салт-дәстүрі мен адамгершілік құндылықтары жайлы өлеңдерін мәнерлеп оқып, ақынның шығармашылығымен тереңірек танысты. Әр өлең оқылған сайын залдан жылы қошемет естіліп, әдеби кештің рухани мазмұны арта түсті.

Екінші бөлім «Ән – көңілдің ажары» деп аталып, музыка пәнінің мұғалімі ақынның сөзіне жазылған әндерді таныстырып, өз орындауында ақынның сөзіне жазылған Теміржан Тойлыбаевтың “Тамаша”және шәкірттері Нұрғиса Тілендиевтің “Өз елім”, Абдрахман Асылбековтың “Жалқаубек” әндерін орындады.

Үшінші бөлімде қазақ тілі мен әдебиеті пәнінің мұғалімі Б. Фаил ақынның қанатты сөздерін оқушыларға таныстырып, оның ой-толғамдары мен афоризмдеріне тоқталды.

Іс-шараны мектебіміздің көркемсөз оқу шебері, бірнеше байқаулардың жеңімпазы, 9-сынып оқушысы Низамдин Мансур жүргізді.

Кеш соңында мектеп директоры Г. Туралиева сөз алып, оқушыларды Қадыр Мырзалиевтің шығармашылығымен тереңірек танысуға шақырып, ақынның өлеңдерін оқуға кеңес берді.

Бұл әдеби-сазды кеш көрермендерге рухани әсер сыйлап, ақынның мұрасына деген қызығушылықты арттырды.
#біртұтас_тәрбие
#қадыр_өлеңдері